doR:
Corine van Ringen
FECHA:
February 13, 2016
Pashon!! Soemanta tòp fotógrafo

Na momentu ku mi ta skibi esakí, ta un djarason mainta nòrmal na Mambo – Boulevard, i mi ta sintá riba un terasa será ainda (un tiki kòfi lo baha bon aworakíJ) sperando riba e fotógrafo Ramsay Soemanta. Ta p’esei tanten mi ta kuminsa skibi un introdukshon kòrtiku; Soemanta tin un don úniko i e ta saka portrètnan maraviyoso. Drùk, drùk e ta, pero danki Dios mi a papia un par ‘i biaha kuné na telefòn i m’a sera konosí ku su otro amor; esta Karnaval di Kòrsou.  Mi pregunta ku si mi por uza algun di su portrètnan pa mi wèpsait, afortunadamente, el a kontestá mi ku “si”. I ku masha orguyo mi por introdusí bo Ramsay i su galería di portrèt fantástiko!

Na Madero, a sigui rapidamente un introdukshon tremendo. Parse tambe ku Ramsay ta un kontadó masha animá i awor ta mi tarea pa mi hinka den otro kasi tres A4 ku anotashonnan ku mi tin den un blòg interesante i legibel :-) .  I hinkamentu den otro ta bai ta poko fèrfelu, pasó Ramsay tin un kaminda di vida interesante, kaminda un solo kos ta para sentral, e perseveransha pa bira un tòp fotógrafo.

Pueees, laga nos kuminsa na e komienso. Ramsay a nase i krese na Kòrsou. Ku su nuebe aña el a emigrá huntu ku su mama pa Hulanda (Spijkenisse), kaminda el a biba te ku 2011. Ramsay for di mucha tabatin un hòbi grandi i esei ta fotografia. Pues ora el a kaba HAVO i e mester a skohe un estudio avansá, naturalmente e kier a hasi su hòbi i pashonh su profeshon.  E tempu ei tabatin solamente un skol di vokashon pa fotografia (na Apeldoorn) i desafortunadamente esei tabata privá i e kurso demasiado kostoso i no tabata un opshon. Ramsay a disidí di bai studia Merkadeo i el a muda pa Rotterdam, pero fotografia a keda determiná su bida.  Despues di su estudio e tabata tur dia den biblioteka di Rotterdam pa buska tur informashon riba fotografia. Tambe despues di su estudio el a bai traha dos aña den un empresa di fotografia pa sera konosí mas detayá ku aparato i téknika di saka portrèt.  Djis un punto di nostalgia: su promé kamára tabata un Konica Pop 50....

Pero entretanto, Kòrsou no a lag’é lòs. Ya algun biaha kaba e tabata ku fakasi, te ora ku su mihó amigu a bin kune fakansi na febrüari di 1997.  Kasi direktamente for di Hato el a terminá na Festival Center, kaminda na e momentunan ei tabatin e festival di tumba. I den su propio palabranan ’’Nan a kumprami! 15.000 hende ku ta bira loko loko!”. Esaki a bira su di dos pashon: Karnaval di Kòrsou.  For di e tempu ei el a keda bini Kòrsou bèk tur aña rondo di e periodo di karnaval pa gosa, festehá i naturalmente pa saka hopi portrèt.

Despues di su trabou na e empresa di fotografia el a disidí pa bin Kòrsou pa un aña. Djis pa saka ‘fo kiko e ke hasi ku su bida. Rapidamente, su sèn di spar a kaba i el a bini riba e idea genial pa saka portrèt di turista. Harmá ku su promé kamára digital i su laptop; tin biaha e ta tin ku fia un outo i sino un mini bùs pa e bai Mambo Beach; saka 12! portrèt di turista; prosesá nan den CorelDraw, pa asina 12 portrèt wòrdu imprentá riba un vèl di papel lombrante; bula bai den e outo fiá (sino e mini bùs); na kaminda pa Tramm, pa laga prent e 12 portrètnan, i bai bèk Mambo lihé manera un flecha, den e outo fiá (sino e mini bùs) sperando ku e turistanan no a bai ainda, pa asina e por a bende nan e portrètnan pa sinku florin. Esaki tabata nèt sufisiente pa tene na bida i ”sinta” su un aña aki na Kòrsou.

Una bes bèk na Hulanda, el a haña masha nostalgia pa e isla. Pero su meta tabata pa tòg hasi ‘’algu’’ ku su bida na Hulanda, pues el a kuminsa buska trabou. Tambe riba eskala chikitu e tabata saka portrèt kontra pago, lokalmente, enkargo chikitu manera fiesta di mucha entre otro. Afortunadamente, internèt a kuminsa floresé, i asina el a haña mas enkargo pa saka potrèt. Na 2006 a bai asina bon ku su sakamentu di portrèt ku el a habrí su negoshi ofisial, ku yudansa di su amiga. For di e momentu ei a bai masha bon mes. Munisipio Rotterdam, Ernst & Young entre otro a bira su klientenan fiho.

Un periodo masha agitá a kumisa na 2008.  Apesar di su eksítonan komo fotógrafo, riba plano personal el a pasa den un tempu turbulento, pasobra su amiga di 25 aña di edat a wòrdu konstatá ku kanser. E tratamentu pisá di e malesa akí a kumisa den ougùstùs di e aña ei i tabata físikamente i emoshonalmente hopi kargá. Dje forma akí su karera di fotografia a wanta un ratu. Pero den e último siman di e trayektoria di tratamentu a sigui un nominashon pa e Mihó Empresario Antiyano bou di 35 aña. Esei tabata pa Ramsay algo fenomenal i ku e mes no por a pensa, pero ku tòg a sosodé; É a gana e premio! I no solamente esei, el a sera konosí ku Norman Serphos, bosero di kas di Antiya, el a haña e oportunidat pa hasi un enkargo, ku finalmente a sòru pa e bira e fotógrafo ofisial di kas di Antiya na Den Haag.

Despues el a sigui krese, tambe den su bida personal, pasobra danki Dios su amiga a mehorá ku e tratamentu.  Asina 2009 a kuminsa bon.  Mientras tantu el a sigui bini Kòrsou tur aña, pa karnaval. J Na 2010, e aña ku Kòrsou a bira outonómo, algo maraviyoso a pasa. Ramsay a topa ku Minister Presidènt Gerrit Schotte durante un bishita na Hulanda. Un siman kompletu, meimei den desèmber, Ramsay a saka portrèt di dje durante e bishitanan ofisial ku Minister Presidènt a hasí. Ok, awor ta bini su mes palabranan ”Mi tabata hañé un hòmber poko arogante, henter siman Minister Presidènt no a papia niun palabra ku mi ni tampoko di mi portrètnan bunita saká”. Esei a kambia durante e último seshon di portrèt ofisial, kanado riba e trapi di kas di munisipio di Rotterdom, Gerrit Schotte a bira diripiente i a puntra kon ta bai kuné i si e ta kla pa bai Brazil.  Esei Ramsay a hasi dos siman despues tambe i e tabata e fotógrafo ofisial di prensa durante e inougurashon di e Presidente nobo di Brazil. Esakí tabata e gran oportunidat, hopi portrèt a wòrdu lansa den media mundial! 

Algun siman despues, entretantu Ramsay a bai bèk Hulanda, el a haña un yamada personal di Gerrit Schotte ku e oferta pa bin traha p’e na Kòrsou. Esei el a hasi finalmente i na jüni 2011 el a bin biba Kòrsou i traha. El a kapturá hopi portrèt interesante ku su kamára durante e tantisimo biahenan i okashonnan ofisial di Minister Presidènt Gerrit Schotte. E último añanan Soemanta a hiba su empresa te na haltu ya i e por mira atras riba un karera masha bunita komo fotógrafo.

Siendo fotógrafo ta den dje, di pia te kabes. Meskos ku e amor pa “mi “ karnaval, kaminda e ta saka portrèt na tur evento. Durante e rekorido di su bida, ku e ta konta ku asina animo, gewon bo ta lubida di hasié pregunta, laga nos bai un ratu riba e kombersashon gewon....kon por ta otro, fotografia. Ramsay a kuminsa saka portrèt for di hóben, el a kuminsa tempu di ròl di film. Akí e posibilidatnan tabata hopi ménos ku awor den e mundu digital.  Bo no por a bai bèk i wak e portrètnan lihé i benta e portrètnan ku a faya afó. E portrètnan mester ta bon mesora, bo no por a mèldu e pareha di brùit ku tur nan portrètnan a frakasá. :-)

Ramsay su sekreto pa éksito ta kreatividat i un konosimentu tékniko di fondo konsiderabel. E ta un perfekshonista, kada biaha di nobo, e ta wak su propio obra krítiko, pa asina mehorá algun punto. Tambe el a kuminsa na 2006 desaroyá su propio estilo, un sierto amor pa kapturá emoshonnan di hende, i e komo fotógrafo den fondo. Si bo mira su portrètnan bo ta mira ku el a alkansá e perfekshon (segun mi antó). E manera akí di traha ta rekerí antisipashon, e abilidat pa por mira den furturo, opservá hende ku su kamára te ora ku nan briya i despues kapturá “the right shot on the right moment’’. Ramsay ta un trendsetter; ‘’pone algu, sòru pa bo mes krea i sigui krea’’ . Sigui desaroyá bo mes i bai te den perfekshon. Su soño ta pa den futuro biaha hopi (naturalmente ku su kamára) i tras di kortina traha reportage pa National Geographic.  Personalmente mi ta spera ku su soño ser realisá.

Tabata realmente un honor pa mantené un kombersashon yen di chispa ku Ramsay Soemanta.  I mi ta masha orguyo ku mi por lansa su trabou den dos galeria di portrèt riba e wèpsait akí. Disfrutaaaa!!!!

Mira  Galería di Pòrtrèt Day Grand Marcha 2015 by Soemanta

Mira Galería di Pòrtrèt Night Teenageparade 2015 by Soemanta