doR:
Corine van Ringen
FECHA:
January 29, 2016
Giovanni Abath, nasé pa ta artista

Ok, mi ta bai konta boso algu honestamente. Esakí ta mi di seis vershon di mi blòg riba e artista kreativo, Giovanni Abath.  Normalmente despues di skibi 2 á 3 vershon ya mayoria di biaha mi ta kla kaba i ta satisfecho ku e teksto, pero ku e blòg akí mi no a logra esaki.  E rason ku mi a tambaleá tantu asina ta pasó mi ta mashá impreshoná ku e talentonan kreativo di Giovanni i mi tabatin miedo ku mi no por a deskribí esaki bon. Ya pa tres dia kaba mi ta manda bisa Minerva ku e entrevista ta na kaminda pa tradusí, pues ku esakí awor sí mi mester lográ!  I ya, semper ta mihó si no tin niun blòg riba Giovanni.    

Djaluna pasá m’ a palabrá ku Giovanni, un artista kreativo masha amabel, talentoso i versátil, aktor i eskritor. A pesar di un periodo masha okupá mes p’é i su tayer, e tabatin tòg un buraku pa un entrevista. M’a bai topé na su kas i tayer na Barber (Banda Abou) i despues di un rekorido den su tayer i un introdukshon na su koleganan, nos a tuma lugá den su pòrch dilanti kas. Ku stòf den su kabei ainda, no feitá, lubidando ku mi lo a bin topé J i entre e hopi yamadanan ku e no a atendé, mi tabatin un kòmbersashon fantástiko. Kon ku nos a hasi e no por a bira un kòmberashon kòrtiku debí na su tantismo trabounan kreativo, su grupo di teater Kara, su trabou komo artista i animadó, su arte plástiko, su poesía i su mira i vishon di bida.     

Laga mi purba duna un resúmen kiko Giovanni ta hasi i podisé bo por bin kai ariba di unda bo konosé. Na promé lugá e tin 6 yu, di kual dos ku su kasá Angelica Abath-Delgado.  Riba enkargo e ta traha hèkwèrk, e tin un trabou fiho na Isla, pero su amor real ta loke e ta hasi banda di su trabou. Giovanni ta aktor i e tin su propio kompania di teater Grupo Kara, kaminda e ta e líder artístiko tambe. Kisas bo konosé komo aktor den e papel mashá emoshonante di Bastiaan, e man drechi di Tula, den e pelíkula tan komentá, “ Tula, the revolt”.  Hopi biaha e ta wòrdu pidí pa ta animadó òf maestro di seremonia, entre otro, el a presentá e festival di tumba e aña’kí.  Ku su kompania di teater Grupo Kara e ta duna treining i organisá fiesta pa mucha. Ta tremendo pa menshoná ku mayoría di biaha pa no bisa tur biaha ku e mes ta skibí, diseña i traha e dekòr pa su obranan teatral.  Esaki so ta di respetá kaba, pero ainda tin hopi kos mas den tapara….               

Si un dia bo tabata den temporada di pasku na Kòrsou, kasi sigur bo no a pèrdè for di bista e fiesta di lus kreativo i ekstravagante, ni  tampoko e stal di pasku típiko kant’i kaminda.  Último añanan Giovanni a hasi hopi trabou riba esakí.  E dekorashon di pasku riba Brionplein i Wilhelminaplein den Willemstad di e aña’ki tabata su obra maetral meskos ku e stal di pasku na Post 5.  Poko poko nos kòmbersashon ta bai dirigí riba su talentonan kreativo i mi ta serando konosí ku un artista di arte plástiko prometedor. 

Na skol na mucha Giovanni tabata bon den obra di man i riba edat hóben e tabata bai yuda e grupo di karnaval na Banda Bou hopi. E amor pa Karnaval i traha kos pa karnaval a bini dor ku na mucha e tabata “Prins di Pancho” i el a risibí un korona mahoso i fis. Pa e hulandesnan bou di nos, na lugá di bisti un tipo di sombré, e prins di karnaval aki na Kòrsou, ta bisti un korona bunita dekorá. Giovanni no a pensa ni dos biaha i e mes a disidí di traha un kopia bunita p’e mes. J. Te dia djawe e ta hasié, traha korona pa e prins, komo un tipo di spònser, pa motibu ku e ta bisa “ku ora bo risibí algu, manera hopi trabou di karnaval, bo tin ku hasi algu bèk”. 

Ku e ta hasi hopi trabou i ku el a hasi hopi tambe pa e Marcha di karnaval, pa mi ta bira bon kla awó. Mi a konosé den e grupo di Isla kaminda el a traha e trahe di Avator blou tan original (na 2014) i e spil rondo (na 2013) i e karosanan. Ya, ya mi tabata un fanátiko promé ku mi a topa é  mes. Pero no por ta otro, e ta hasi hopi mas.  E aña akí e ta diseña pa mas o ménos 7 grupo di karnaval diferente karosa  (entre otro esun di Miss Kòrsou di 2016) i tambe un kantidat grandi di piesanan pa dilanti     i mei mei di e grupo. Djis pa e Hulandesnan ku no sa nada: esakinan ta karoshi chikitu i bunita ku ta na kuminsamentu òf mei mei di e grupo.                                           

Giovanni ta diseñá e karosa di akuerdo ku e gruponan nan deseo, i djis despues mi tabatin den mi man pinturanan kolorido i bunita di e karosa di Vice Versa. Pa despues e bai traha e piesanan akí ku algun koleganan entusiasmá den su tayer. Tambe e tin un ekipo di mas o ménos 20 hende na kas ku ta dekorá e base di e diferente piesanan i hasinan aun mas bunita. Mi ta mashá  kurioso i mi ta lag’é sorpresa mi ku e piesanan bunita ku el a traha pa e marcha binidero.                  

Banda di hinka tur su esfuersonan di su talento kreativo den karnaval, Giovanni ta traha tambe arte moderno magnífiko.  Piesanan imobil presioso pa e eksposishon di arte di Isla.  Orguyoso e ta mustra mi e pòrtrètnan i e ta konta mi historia di kada unu di su piesanan. Mi ta haña nan impaktante i fuerte, tantu e imáhen komo ehekushon i e historia su tras. Lástima ku e blòg akí ta muchu kòrtiku i ademas e mester bai tokante di karnaval, pasó ami lo por skibi fásilmente dos A4 mas.     

Segun nos ta bai den e kòmbersashon mi ta bira aun mas i mas impreshoná ku Giovanni su enorme talento kreativo, pero tambe di su simplesa i sabiduria.  A pesar di un kantidat grandi di trabou, kada piesa ta impreshonante i bunita pa wak. E atardi ei na Barber mi tabatin un enkuentro úniko ku un hòmer úniko; nase pa ta artista!                                              

Despues di e marcha di 2016 lo mi traha un galeria di pòrtrèt bunita riba nos wèpsait ku un resúmen di su trabou kreativo pa karnaval, asina bo mes por wak nan ku bo propio wowo!