doR:
Corine van Ringen
FECHA:
January 14, 2016
Nos redaktor Minerva Hieroms

Ora bo ta duna un homenahe (manera e wèpsait akí, ta hasiendo) ta masha importante pa e hendenan ku bo ta dediká esaki na nan, ku nan por lesele. Ta p’esei mes mester a bini un tradukshon na papiamentu, esta dushi,no :-) !!

Despues di un petishon riba e página di Facebook, “DurftevragenCuracao”, m’a risibí rapidamente un reakshon kaminda mi a haña un rekomendashon pa un kantidato serio. Despues di un kontakto telefóniko ya mi tabata sa sufisiente, e klek tabata tei, e kòmbersashon a bai dushi, mi sintimentu tabata bon. Tabatin interkambio di informashon i un enkuentro di introdukshon a ser planiá.

Tur kos a kana super bon, pues awor no a keda mi nada mas pa introdusí bo nos redaktor di e edishon na papiamentu: señora Minerva Hieroms, direktor di e kompania Worldwide Training & Transalations. Un dama elegante i bunita ku un amor speshal pa idioma. Nos ta orguyoso tambe di su kontribushon na DivaliZia Magazine. Minerva no solamente ta papia 8 idioma bon, banda di su idioma materno papiamentu, pero tambe e ta mashá pashoná ora ta trata di idioma.

Esaki tabata mesora obvio for di momentu ku mi a kuminsá papia riba e tradukshon di e wèpsait. Su wowonan ta briá ora e ta konta mi di su tradukshon, ta manera ta un kuenta di ada (por lo ménos asina e ta zona den mi orea antó, pasó ami mes no ta komprondé nada nadaJ). Ta un eksperensha úniko, pasobra tradusí tekstonan personal sigur ta un asuntu di konfiansa. Tambe e tabata partikular, pasobra sanguranan tabata bula rondo di mi i ronka manera ta guera tin, kla pa ataká i kome mi pianan. Minerva a keda zwai ku e raket di insekto rondo di mi pa mei ora sin para, lesando e tradukshon pa mi ku hopi entusiasmo :-) !

Durante nos promé enkuentro, den su hardin kolorido i bunita mantené, nos a pasa dor di su bida impreshonante. Promé ku tur kos Minerva ta mama di dos yu, un yu hòmber, Christopher Willems, awor 29 aña di edat bibiendo na Hulanda kaminda e ta graduando, aunke su pashon i talento di mas grandi ta pa musik! E yu muhé di Minerva ta Crystal Willems, 27 aña di edat, un modelo bunita. E tambe a partisipá na e sertámen di Miss Kòrsou den 2013.

Banda di ta mama, Minerva a hasi un karera impreshonante. El a traha 27 aña ku diferente kompania di aviashon (entre otro: KLM i ALM) komo stewardès. Ku su abilidat pa idioma e por a atendé e pasaheronan personalmente den nan propio idioma. Entre tantu pa algun aña kaba e tin su propio empresa kaminda e ta fasilitá treining na empresanan riba tereno di komunikashon, servisio i etiketa. Naturalmente su pashon pa idioma no por keda ‘fó, pues su empresa ta ofresé servisio di tradukshon tambe.

Minerva tin kreatividat den su genanan, e por traha pakete di pasku hopi original, su kas i hardín ta dekorá yen di grasia i e pinturanan i kuadronan ku e ta pintá ta masha bunita mes! 

Banda di tur esakinan Minerva semper tabatin interes pa moda i beyesa i den pasado e tabatin un kolumna riba e tópikonan akí den un korant respetá di Kòrsou. Na e momentonan akí un bèl mester a rin, pero e no a rin J. Despues di nos promé kòmbersashon (kaminda m’a kere ku mi tabata sa basta di dje), nos a tuma despedida, i Minerva a bisa mi ku ainda e sorpresa mes mester bini. Mi no tabatin niun idea kiko esaki por ta, pero m’a keda naturalmente mashá kurioso mes, pues ora m’a yega kas, mesora m’a bai google su nòmber. I awèl, mesora e bèlnan a kuminsá rin J. Henter atardi m’a sinta papia ku Miss Kòrsou 1982! (sin sa) Esta un honor!!  

E tradukshon i e kooperashon ta kana sublime, pasobra e edishon di papiamentu di nos DiVaLiZia Magazine ta kompletamente kla! (bueno, pues e último revishon di ayera ainda no ta kla, mi ta bai hasi’é djis akí!          

Mashá danki Minerva, mi ta orguyoso ku nos ta traha huntu!!           

“Wow, sin palabra ...”, Minerva