Oro pa Dushi Aventura!!

Ya promé ku Karnaval m’a topa ku Lucien Elisa (portrèt), presidente i fundadó di e grupo di karnaval: Dushi Aventura. Nos a palabrá pa topa den nan tayer bunita (nan Sede) den Amerikanenkamp unda e último preparashonnan pa e Marcha 2016 tabata tuma lugá. Den su bida diario e ta kontroladó di tráfiko aereo, pero su pashon ta karnaval! Esaki tambe ta bisto durante nos kòmbersashon, entusiasmá i ku un briyo den su wowonan el a konta tokante su ‘’pashon imenso” Dushi Aventura. Tabata nèt dos siman promé ku Gran Marcha, pero strès na e Sede no tabata niun kuestion. E karosanan mester a wòrdu konstruí ainda, pero tur e trahenan i e kosnan rondó di e trahe tabata kla. Manera Lucien mes ta bisa:”Nos ta kuminsá tempran, nos ta sigui nos planifikashon i mayoria di biaha nos ta kla un siman promé ku e Marcha!” Mi ta haña esaki tòg basta úniko, m’a tira un bista rápido rondo di mi i m’a ripará ku tin hopi trabou, hopi trabou mes, trabou fantástiko!

Pero laga mi kuminsá na introdusí bo e grupo di karnaval hóben aki. Dushi Aventura ta eksistí e aña aki 5 aña, nan a kuminsá den 2012 ku 35 partisipante i ta kuminsá e aña akí ku 102 (!) karnavalista. Bo ta topa Dushi Aventura den e Marcha komo un grupo ku ta resaltá, original i ku un aparensia kreativo, pasó nan ta realmente un grupo kompetetivo. E elaborashon di e tema kada aña ta te den detaye hasí i nan ta kai tambe regularmente den premio. E temanan te ku awor tabata: 2012 “Calalelies”. 2013 “Adelnan” 2014 ‘’Karikatura” 2015 “Duna Ceasar loke ta di Ceasar’’ (portèt) of duna mérito na esun ku ta meresé. (potrèt)

Mi a haña tambe un bunita bista di e tema di e aña akí:’’E tesoronan di Nilo”. I bon mirá esei tabata mas ku obvio, nos a hiba nos kòmbersashon literalmente meimei di e tantísimo piesanan di trahe fantásiko ku tabata kla i kologá pa e Marcha. E tema egipsio tabata lusi, Cleopatra, Wowo di Horus, Anubis, Farao den kombinashonnan di kolónan kla ku un base di oro, ku hopi detaye lombrá. Tambe mi tabatin mag di tira un bistaso korto den e depósito di e headpeace i piesanan di man, tabata parse ku bo a kana drenta den e kamber di tesoro di Toetanchamon. No tabata pèrmití pa saka potrèt ainda, un grupo kompetitivo mester laga tur kos sekreto te dia di Marcha.

Kada aña Lucien i su grupo mester kuminsá na tempu. Mas o ménos kuminsamentu di jüni (e aña promé ku e fecha di karnaval) e pinturanan ku tur detaye di e tema ta kla. E pinturanan ta di Albertico Sambo (Tico). Despues esakinan ta wòrdu elaborá pa diseñadónan i artistanan konosí.  Kada detaye, kada stenchi chikitu, kada gleter riba e piesanan i trahe ta obra di man! Respèt!

Mientras tantu nos a mira Dushi Aventura briya den oro manera tesoronan di Nilo. Dèftu manera e egipsionan di oro; ku artefaktonan di man enorme i un karosa grandi ku Farao i Cleopatra saludando, nan tabata e último grupo di e Marcha 2016, bale la pena i un klousura fenomenal!  Ayera mi a bai bishitá Lucien un ratu na e Sede, pa e konta su eksperensha di e Karnaval ku a pasa. E tabata ainda entusiasmá. E mesun briyo den su wowonan a aparesé atrobe, segun mi den su kabes ya e ta pensando kaba pa otro aña. J E ta satisfecho! Satisfecho, pasó tur hende i e públiko a laga sa kon bunita nan tabata! Satisfecho, pasó e éksito ta di e grupo, loke e públiko grandi ta haña di Dushi Aventura!

Finalmente mi ke gradisí imensamente Lucien i tur hende di Dushi Aventura ku a pèrmití mi eksperenshá e fiesta di húbelo di 5 aña. E ambiente, e gezelligheid i e resepshon amabel tabata supertòf! Masha danki!

Riba e página bo por mira un kolekshon di potrèt di Dushi Aventura 2016 by Corine Fotografie KLEK AKI.

Photocredits HRLM&TS Photography