Jakeema Hernandez i amigunan!!

Komo un prinsipiante di blòg riba karnaval, mi a bishitá den luna di sèptember di aña pasá, e presentashon di trahe di karnaval di Grupo Estreno MAS Pikete den Sambil.  Aya m’a topa un par di dama bunita; Jakeema Hernandez i su amiganan. Nan a konta mi entusiasmá tur e ins- & outs di e grupo di karnaval akí i nan eksperenshanan ku nan tabatin den e  grupo di mucha i tiner te ku awor. Loke mi por a komprondé tambe ta ku ta pa promé biaha nan lo a bai partisipá den e Grupo akí den e Gran Marcha.   Nos a interkambiá e-mail adrès i e anochi ei a sigui su rumbo! (Manera bosnan por a lesa den e blòg anterior :-) ).

Despues di algun tempu m’a disidí di bolbe bishitá nan pa nos kòmbersa ampliamente ku e berdadero karnavalistanan akí i pa nos introdusí nan na boso riba e wèpsait akí. E kòmbersashon akí a tuma lugá algun siman promé ku e Gran Marcha riba un djasabra den e SEDE (tayer) fantástiko i sumamente drùk, kaminda Quincy i Hyacinth Sintiago a invitá mi i a risibí mi kalurosamente.

Despues ku nos a haña un lugá agradabel pafó, kaminda bientu ta supla, m’a sera konosí ku Jakeema Hernandez, su prima Sheanty Cicilea i su amiga Dianthe Rijnschot. Jakeema tin 26 aña, e ta studia hulandes na UOC (anteriormente UNA), i na e momentunan aki e ta kore stadje na su skol “bieu” Maria College i e ta spera di kaba su estudio na yüli próksimo. Sheanty tin 23 aña, e ta studia HRM na UOC i ta terminá e aña aki. Dianthe ta komprometé i e ta un mama orguyoso di un yu muhé Ahzani    (ku e tempu ei tabatin 9 luna). El a studia na Rotterdam i awor e ta biba atrobe na Kòrsou. E aña’ki ta pa promé biaha e ta partisipá den e Gran Marcha.

E primanan Jakeema i Sheanty nan a lanta ku karnaval for di kuna :-) for di mucha nan tabata envolví den Karnaval, e preparashonnan i nan partisipashon den e marchanan. Mihó bisá: karnaval ta den nan sanger!!!

Jakeema tabata hopi yòn mes, mas o ménos dos siman bieu, ora el a eksperenshá su promé Karnaval, pasó e tabata dushi drumi den su kama den un kas kant’i kaminda riba e ruta di e Gran Marcha. Ademas nan tur dos a lantá den kas di nan wela, kaminda Sheanty su mama, señora Minouschka St.Jacoba, un 11 aña pasá a fundá e grupo di mucha Chikitous huntu ku e mama di Jakeema, señora Menolva St.Jacoba. Naturalmente e dos primanan a partispá tur e dies añanan den Chikitous den e Marcha di Mucha. Den e kas di nan wela nan tabata semper envolví ku trahamentu di e trahenan i piesanan pa e grupo. Den 2015 Chikitous a stòp, pero no sin a bira e “grupo di aña” e aña ei!!

Den e temporada ku nan tabata na skol avansá Jakeema i Sheanty a partispá vários biaha den e grupo di tiner di Maria College i CDC. Despues tambe nan a partisipá den e Gran Marcha ku e grupo Primeum (2013/2014; grupo di señora Minouschka St.Jacoba). Apesar ku nan mayornan no tin un grupo di karnaval aktivo mas, nan a keda mashá envolukrá i nan tur ta partisipá sí den e Gran Marcha e aña akí. Tambe Minouschka St. Jacoba a organisá e Jump-in Festival, den Spoonz den Saliña ku tur e bandanan popular, DJ i e artistanan di rèp, klaro ku Sheanty i Jakeema a yuda  boluntariamente.

Jakeema mes a organisá e aña akí durante di su stadje na Maria College, huntu ku Christopher Josepha, e aktividatnan di karnaval di e skol. Tabatin un sertamen di Mister & Miss i un djùmp en ku DJ! Tambe e Rei di Tumba di mucha Roxenia tabata e artista invitá. Respèt!

Wèl, esaki ya ta un istoria kompletu di Karnaval den bida di e damanan hóben aki di Kòrsou! Bon mirá, awor sí m’a bira mas kurioso dikon nan a skohe pa partisipá e aña aki i spesialmente, dikon nan eskoho a kai riba Estreno Mas Pikete. E respuesta pa e pregunta akí nan no mester a pensa masha :-) ). E ambiente, e trahenan, e banda di kas Dreams ku e kantante fabuloso Gigi i e tumbanan kayente! Tambe Rei di Tumba (2015) Amos Balentien lo a presentá komo artista invitá den e Marcha!!!

Pa Jakeema i su amiganan tabata ainda un poko suspenso si nan lo por a partisipá den e grupo, debí ku a aña ‘kí  e inskripshon a surpasá e límite. Danki na e intermediashon di e suegra di Dianthe (ku ta miembro di Di Pikete), ku nan por a partisipá den e marcha di e aña’kí. Nan tur tres tabatin hopi ekspektativa di e Marcha: masha masha ambiente, pa lusí den trahenan bunita, baila, ta huntu i hari ku amigunan i koleganan!! I ku e palabranan aki nos a klousura nos kòmbersashon sumamente agradabel den e SEDE e djasbra anochi ei.

Durante di e Marcha Estreno MAS Pikete a pasa!!! Sinkushen karnavalista fantástiko i kolorido tabata bailando i disfrutando den nan tema “Fantasia di Pantomine”. Bailando riba e tononan bibu di Dreams! Fiesta grandi, ambiente tabata TOP!! I ya, ata nan ei!! Jakeema i su amiganan, masha bunita mes den nan trahe i nan kara bunita pintá; modelando djis un ratu dilanti e kamára di saka portrèt di Henk Middeljans i suskrito. “Superleuk” danki!

Den e fin di siman ku a pasa m’a bishitá Jakeema i Sheanty djis un ratu na kas di nan wela den Santa Maria, pa nan por a konta di nan eksperensha di e Karnaval ku a pasa. Tur nan ekspektativanan a wòrdu kumplí kompletamente! E aktividatnan di karnaval na Maria Collega a bai tremendo! E resultado di e sertamen di Mr & Miss a bai bon i tur hende a djùmp bai gol!

Partisipando tambe pa promé biaha den un grupo sin ku ta di bo mes, ta tremendo!!! Gosando sin fin di e festival (tur e djùmp-en) promé ku karnaval, sin niun strès pa traha trahe, dushiii!! Durante di e Marcha den e grupo Di MAS Pikete tabata un eksperensha fenomenal!! Bailando dushi, na un lugá tremendo, dilanti di e treiler di Dreams, pasó ei tabatin dushi espasio i e kontakto ku e públiko tabata bon. Estreno MAS Pikete ta yòn i inovadora i e aña’ki nan tabatin asta un bar di kòkteil! Mogito en bes di Wiski ku kola :-) ). Amos Balentien a duna su presentashon den Otrabanda, leuk!

Tabatin ambiente i esei tabata chispa dan nan kara!!!

Finalmente mi kier a yama danki na Jakeema, Sheanty i Dianthe, Quincy i Hyacinth Sintiago i tur hende den e SEDE pa nan resepshon amabel i e tempu ku tur hende a traha liber pa mi por a skibi e blòg aki. Thanks!

First shown photo by HRLM&TS Photography

Videocredit damian2dc