Sera konosí ku Señor Gerrit Scheper        

Via di e departamentu di deporte i rekreo di Isla, m’a bin den kontakto ku Señor Gerrit Scheper ku tin 23 aña partisipando den e Grupo di Isla. Un sita pa un entrevista a wòrdu reglá rápidamente na e SEDE (e kantina) i asina a sigui un splikashon ku akí na Kòrsou so nos konosé tokante kon pa haña e lokalidat. Pa resumí, esaki a bai mas o ménos riba e siguiente manera: Pasa kantu di e hèki, via di e lus di pasku, banda un edifisio den konstrukshon, te ora bo yega un kas di pòrtir. A pesar di e splikashon perfekto di señor Scheper, tòg mi tabata pará dilanti di e kas di pòrtir róbes. Danki Dios, ei nan a splika mi e ruta bon kon pa yega ku asina mi a yega tòg na tempu pa e sita.      

Señor Gerrit Scheper ta partisipando 23 aña kaba den e Grupo di Isla, inisialmente, el a kuminsa den e komishon di karosa i dekorashon i algun aña despues el a wòrdu aserká i nombrá komo presidente di e direktiva. Despues di su penshun el a retirá komo presidente, pero dos aña después nan a bolbe puntré pa bira presidente. Pa hopi aña kaba e ta un di e motornan tras di e grupo di karnaval úniko akí.  E Grupo Isla ta úniko pasó el a wòrdu fundá pa e personal di e kompania Isla.  Isla ta ofresé e oportunidat akí pa asina mehorá e kontakto sosial bou di e trahadónan. Ku esaki ta eksitoso lo mester ta, pasobra ya pa 29 aña(!)  kaba e Grupo Isla ta partisipando na e marcha di Karnaval di Kòrsou. Pa e último añanan nan ta partisipá na e karnaval di St.Maarten tambe. E aña’kí atrobe nan ta partisipá ku un grupo hubenil (mucha di 7-15 aña) i un grupo di adulto bon representá den e Marcha. Kada grupo ta konsistí di 100 (!) partisipante ku ta konsistí di yunan di e trahadó i introdusidonan. Tur aña di nobo tin tambe un lista di espera, pa esnan ku (ainda) no por partispá.

Banda di señor Scheper e direktiva ta konsistí di 4 persona mas. E direktiva ta mas ò ménos henter aña okupá ku organisashon di e dos gruponan, hopi  ora ta wòrdu dediká boluntariamente, mi tin masha rèspèt p’ esakí!!!  Na kuminsamentu di sèptèmber e direktiva ta kuminsá ku e preparashonnan grandi i nan ta reuní un bes pa siman. Preparashon ta enserá tur kos relashoná ku logístika, kompra, trahe, karosa i naturalmente horeka.                  

Horeka? Bo ta pensando riba Hulanda? Sígur ku sí! Algo masha imortante den e marcha tropikal di rònt 7 kilometer.  Kada grupo, pues Isla tambe, tin su trùk ku bar inkluso personal di servisio ku ta bai den e marcha. Riba señal di e karnavalistanan bailando, nan ta wòrdu sirbí pasapalo, pero tambe bibida. Whiski i ròm, ta wòrdu sirbí den e refreskonan popular J! Banda di e bar akí, e partisipantenan ta kome huntu promé i despues di e marcha, awèl, organisá esakí tambe ta un di e hopi tareanan di e direktiva.               

Un otro tarea ta kompra di kantidat grandi di material i tela pa e trahenan fantástiko i original i tambe pa e karosa di Grupo Isla. Kompra ya ta kuminsá for di sèptèmber. Nos ta kumpra tur lokual nos por haña na Kòrsou promé. Después nos ta bai buska den eksterior. Den pasado nos a kumpra entre otro na Aruba i Trinidat. E último añanan nos a kumpra mayoría tela i adorno pa e trahenan, sombrénan, headpiece i asesorionan na New York. Despues ku kaba di kumpra tur kos ta kuminsá kose e trahenan den e tayer di kose.                                  

Temporada di pasku ta un periodo trankil pa un ratu, pa despues kuminsá atrobe  yen di ánimo i huntu ku e grupo kompletu ta traha masha duru mes pa keda kla na tempu pa e Marcha. Den e periodo akí señor Scheper tei kasi tur dia, meskos ku e otro boluntarionan ku ta traha miles i miles di ora pa dekorá e trahenan, sombrénan, headpiece, sapatunan i asesorionan super bunita ku yen di detaye. E trahenan ta keda sekreto te riba e dia di Gran Marcha mes.  Suskrito, fanátiko di trahe (ami pues J), por solamente bisa bo ku nan ta masha bunita mes i ku mi a enamorá di e diseño.

Mi por solamente ekspresá un biaha mas mi apresio i rèspèt pa señor Scheper, restu di e direktiva, tur e boluntarionan i partisipantenan di Grupo Isla. Ku hopi dedikashon, amor i trabou konhunto tur aña di nobo nan ta presentá riba un manera fenomenal den e marcha! I nos ta disfrutá imenso!! Den mi próksimo blòg riba Grupo Isla lo mi konta bo di mi bishita na e tayer di Grupo Isla. Ta un enkuentro dushi ku hendenan entusiasmá!

Pictures by The Soemanta Blog and HRLM&TS Photography