Danki Kòrsou pa e Marcha 2016 tan espektakular!!

Despues di un pousa kòrtiku pa kue poko rosea, mi ta bolbe sigui ku e blòg, notisianan i entrevistanan tokante Karnaval riba Kòrsou. E fiesta ta sigui! Promé ku tur kos, mi ke ku e blòg akí gustosamente yama danki i ekspresá mi atmirashon pa e organisashon, tur institutonan enbolbí, e gruponan di Karnaval, e artistanan kreativo i tur hende ku a hasi e Marcha 2016 un evenementu realmente bunita i grandioso! Tabata un ambiente total!

E aña’ki tabata pa mi tambe èkstra speshal. Harmá ku un karchi di prensa, kámara di saka portrèt i un bòter di awa, mi tabata manera un mucha den e tienda di kos dushi meimei di tur luho i pompa di e Marcha. Emoshonante i leuk tabata e muchanan di Marcha di mucha. Reinanan chikitu saludando manera ta esei so nan a hasi semper, muchanan di chikí te grandi, den trahenan kolorido, huntu ku nan guianan entusiasmá, manera bailarinan (kasi) perfekto pasando kasi dos ora largu. I laga mi tambe elogiá en grande e kantantenan tin biaha hopi hóben i músikonan ku a presentá bibu den e marcha i a trese hopi ambiente. Super!

Un bishita na e masahista di deporte después di e marcha di mucha tabata nesesario tambe pa kalentá pa e parada di hóben ku a sigui algún dia despues. Danki Dios mi pianan tabata atrobe up-and –running, pasó esta un energia!!! Esta un shou i prestashon tremendo di e tinernan di Kòrsou. E públiko a bira loko loko di e parada tremendo i kolorido akí. Smashing!!

I manera nos hulandesnan ta bisa, a bini e chèri mes mes riba e bolo grandi; E Marcha Grandi i e Marcha di Despedida. Kòrsou a ofresé pa kuater ora largu su tarheta di bishita di mas kolorido, bailando, kada grupo di karnaval mesun bunita i original, e tumba mayoría di biaha en bibu for di e sistema di zonido.  Artistanan invitá konosí, hendenan festehando kant’i kaminda, awèl, lo mi bisa un biaha mas den un solo palabra: Un lokura! 

Tabata un honor komo blòger i fotográfo ta pará entre e hendenan di e marcha pa sinti, mira i tende (ok, pero naturalmente ku dòpinan di orea J)  kon bibu bibu Karnaval ta aki. Mi no tabatin wowo sufisiente pasó kada paso ku mi dal por resultá den un potrèt bunita i pasó mi kier a wak tambe kada trahe detayadamente un ratu sin lèns di kamára mi dilanti!

Nos ta kontinuá ku nos blòg pa tene bo informá i pa sera bo konosí ku e mundo úniko akí. Un aplouso pa e hendenan ku ta tras di evenementu di mas grandi i úniko na Kòrsou. Keda pendiente!!

Un danki speshal pa Curaçao Carnival Organisation, Reynard Fransisca!

Potrèt ta riba página di FB DiValiZia Magazine